Mar 14:53-65 | YomNWM | STEP | Banata Yesu kuidi pfumu yi banganga Nzambi, kuna ku kutakana bapfumuzioso zi banganga Nzambi, bakulutu ba dibundu ayi minsoniki.

Mark 14:53-65

Basambisa Yesu

(Matayi 26.57-68 ; Luka 22.54-55,63-71 ; Yowani 18.12-14,19-24)

53 Banata Yesu kuidi pfumu yi banganga Nzambi, kuna ku kutakana bapfumuzioso zi banganga Nzambi, bakulutu ba dibundu ayi minsoniki. 54 Piela wunlandakana kuna manima, nate ku luphangu lu pfumu yi banganga Nzambi. Wuvuanda va kimosi ayi minsungi va muenda mbazu yi bayota. 55 Bapfumu banganga Nzambi ayi batu boso ba lukutukunu lunneni batomba kimbangi mu diambu di Yesu muingi babaka bila ki kumvondisila vayi basi baka ko. 56 Bila bawombo batuba bimbangi bi luvunu mu diambu diandi, vayibimbangi beni bisia dedakana ko.

57 Buna ndambu yi batu bankaka batelama mu telama kimbangi ki luvunu, bawu bakamba :

58 —Tunwa bu katuba ti : “Ndiela tiolumona Nzo Nzambi yayi yitungulu mu mioko mi batu vayi mu bilumbu bitatu, ndiela tungayinkaka yoyo yela kambu tungulu mu mioko mi batu.”

59 Vayi ka diambu ko batuba bobo, bimbangi biawu bisia dedakana ko.

60 Buna pfumu yi banganga Nzambi wutelama va khatitsika batu boso ; wuyuvula Yesu :

—Kadi diambu wukadi vutula e ? Kimbangi mbi kioki batu baba balembo kutelimina e ?

61 Vayi Yesu kasia vutula kadi diambu ko.

Pfumu yi banganga Nzambi wunyuvula diaka :

—Ngeyo widi Klisto, Muana wu mutu wowo wusakumunu e ?

62 Yesu wumvutudila :

—Nyinga, ndidi Klisto ! Ayi luela mona Muana Mutu vuendi va koko ku lubakala lu Nzambi, nkua lulendo boso ayi luela mona phila kela kuizila mu nkembo mu matuti.

63 Buna Pfumu yi banganga Nzambi, wukanzuna minledi miandi ayi wukamba :

—Bila mbi tufueti buela tombila bambangi bankaka e ? 64 Beno veka luwilu phila kavuezidi Nzambi. Beno buevi lumbanzila e ?

Babo banzengila nkanu wu lufua.

65 Buna bankaka banlobudila madita, bamfukidila busu bosi banzuba zikhomi ayi bankamba :

—A ngeyo, bikula e !

Bosi minsungi minnata ayi mimbeta.